karta use beqarar kuch der
(2 votes, average: 4.5 out of 5)
Loading ...karta use beqarar kuch der
hota agar ikhtiyar kuch der
kya royein fareb-e-aasmaan ko
apna nahin aitbaar kuch der
aankhoN mein kati pahaar si raat
so ja dil-e-beqaraar kuch der
ai shehar-e-tarab ko jaane waloN
karna mira intizaar kuch der
bekaifi-e-roz-o-shab musalsal
sarmasti-e-intizaar kuch der
takleef-e-gham-e-firaaq dayem
taqreeb-e-wisaal-e-yaar kuch der
ye guncha-o-gul hain sab musafir
hai kaafila-e-bahaar kuch der
dunyaa to sada rahegi Nasir
ham log hain yaadgaar kuch der
Nasir Kazmi
To receive free updates on new Ghazal, Nazm and Mushaira postings, please visit subscribe for options.
