Aligarians.com

kise dekhein kahaaN dekha na jaye
wo dekha hai jahaaN dekha na jaye

miree barbaadioN per rone wale
tujhe mahv-e-fugaaN dekha na jaye

zameeN logoN se khaali ho rahi hai
ye rang-e-aasmaaN dekha na jaye

safar hai aur gurbat ka safar hai
gham-e-sad-kaarvaaN dekha na jaye

kahiin aag aur kahiin laashoN ke ambaar
bas ai daur-e-zamaaN dekha na jaye

dar-o-deewaar weeraaN, shama maddham
shab-e-gham ka samaaN dekha na jaye

purani suhbatein yaad aati hain
charaghoN ka dhuaaN dekha na jaye

bhari barsaat khaali ja rahi hai
sarabar-e-ravaaN dekha na jaye

kahiiN tum aur kahiiN ham, kya ghazab hai
firaaq-e-jism-o-jaaN dekha na jaye

wahi jo haasil-e-hastii hai Nasir
usi ko meherbaaN dekha na jaye

To receive free updates on new Ghazal, Nazm and Mushaira postings, please visit subscribe for options.