mausam-e-abr ho subuu bhii ho

(2 votes, average: 4.00 out of 5)

 Loading ...

2,589 views

mausam-e-abr ho subuu bhii ho
gul ho gulshan ho aur tuu bhii ho

kab tak aaiine kaa ye husn-e-qubuul
muuNh teraa is taraf kabhuu bhii ho

ho jo teraa saa rang gul kaa hai
dekheN ham tab jab aisii buu bhii ho

hai gar’z ishq sirf hii lekin
shart ye hai ke justujuu bhii ho

sarkashii gul kii sar nahiiN aatii
naaz karne ko vaisaa ruu bhii ho

kis ko bulbul hai dam-kashii kaa dimaagh
ho to gul hii kii guftuguu bhii ho

dil tamanaa-kadaa to hai par “Mir”
ho to us kii hii aarzuu bhii ho

Mir Taqi Mir