andaaz huu-ba-huu terii aavaaz-e-paa kaa thaa
(4 votes, average: 3.25 out of 5)
Loading ...andaaz huu-ba-huu terii aavaaz-e-paa kaa thaa
dekhaa nikal ke ghar se to jhauNkaa havaa kaa thaa
is husn-e-ittefaaq pe luT kar bhii shaad huN
terii razaa jo thii, vo taqaazaa vafaa kaa thaa
dil raakh ho chukaa to chamak aur baRh ga’ii
ye terii yaad thii ke amal kiimiyaa kaa thaa
is rishtaa-e-latiif ke asraar kyaa khuleN
tu saamne thaa aur tassavvur Khudaa kaa thaa
chhup chhup ke rouuN aur sar-e-anjuman haNsuuN
mujh ko ye mashvaraa mere dard-aashnaa kaa thaa
uThThaa ajab tazaad se insaan kaa Khamiir
aadii fanaa kaa thaa to pujaarii baqaa kaa thaa
TuuTaa to kitne aaiinaa-KhaanoN pe zad paRii
aTkaa huaa gale meN jo paththar sadaa kaa thaa
hairaan huN ke daar se kaise bachaa “Nadeem”
vo shakhs to Ghariib-o-Ghayuur intihaa kaa thaa
Ahmed Nadeem Qasmi
To receive free updates on new Ghazal, Nazm and Mushaira postings, please visit subscribe for options.
fine
“uTThaa ajab tazaad se insaan kaa Khamiir
aadii fanaa kaa thaa to pujaarii baqaa kaa thaa”
aadii = habituated (used to)
bahot khuub!
[...] andaaz huu-ba-huu terii aavaaz-e-paa kaa thaa dekhaa nikal ke ghar se to jhoNkaa havaa kaa thaa [...]
Very nice
chhup chhup ke rouuN aur sar-e-anjuman haNsuuN
mujh ko ye mashvaraa mere dard-aashnaa kaa thaa
is se numanya ek or sher yaad aaya
din mein hamko dekhne walon,apne apne hain aukhaat
jao na tum in khushk aankhon pe,hum raaton mein ro le hain