Aligarians.com

jo bhii dukh yaad na tha yaad aayaa
aaj kyaa jaaniye kyaa yaad aayaa

phir ko’ii haath hai dil par jaise
phir teraa ahd-e-vafaa yaad aayaa

(ahd-e-vafaa : promise)

jis tarah dhuNdh meN lipTe hu’e phuul
ek ek naqsh teraa yaad aayaa

(dhuNdh : fog; naqsh : markings, prints)

aisii majboorii ke aalam meN ko’ii
yaad aayaa bhi to kyaa yaad aayaa

(aalam : condition)

ai rafiiq sar-e-manzil jaakar
kyaa ko’ii aablaapaa yaad aayaa

(rafiiq : well-wisher; sar-e-manzil : near destination; aablaapaa : blisters in feet)

yaad aayaa thaa bichaRnaa teraa
phir nahiiN yaad ke kyaa yaad aayaa

jab ko’ii zakhm banaa daaGh banaa
jab ko’ii bhuul gayaa yaad aayaa

(daaGh : stain, scar)

ye muhabbat bhii hai kyaa rog “Faraz”
jis ko bhuule vo sadaa yaad aayaa

Ahmed Faraz

To receive free updates on new Ghazal, Nazm and Mushaira postings, please visit subscribe for options.