Aligarians.com

dil-e-naadaaN tujhe hu’aa kyaa hai
aaKhir is dard kii davaa kyaa hai

(naadaaN : one without wisdom; davaa : remedy)

ham haiN mushtaaq aur vo bezaar
yaa ilaahii ! ye maajraa kyaa hai

(mushtaaq : interested; bezaar : sick of; maajraa : happening)

ham bhii muuNh meN zabaan rakhate huuN
kaash puuchho ke mudda’a kyaa hai

(muuNh : mouth; zabaan : tongue; mudda’a : issue)

jab ki tujh bin nahiiN ko’ii maujuud
phir ye hangaamaa ai Khudaa kyaa hai

(maujuud : present; hangaamaa : chaos)

ye parii-cheharaa log kaise haiN
Ghamzaa-o-ishvaa-o-adaa kyaa hai

(parii-chehraa : fairy faces; Ghamzaa : amourous glance; ishvaa : ? ; adaa : elegance)

shikan-e-zulf-e-ambarii kyoN hai
nigah-e-chashm-e-suurmaa saa kyaa hai

(shikan : wrinkle; zulf : tresses; ambarii : fragrance; nigah : glance; chasm-e-suurmaa : kohl eyes)

sabzaa-o-gul kahaaN se aaye haiN
abr kyaa chiiz hai havaa kyaa hai

(sabzaa-o-gul : greenery and flowers; abr : a cloud; havaa : wind)

hamko unse vafaa kii hai ummiid
jo nahiiN jaante vafaa kyaa hai

(vafaa : fidelity; ummiid : hope)

haaN bhalaa kar teraa bhalaa hogaa
aur darvesh kii sadaa kyaa hai

(bhalaa : good; darvesh : mendicant; sadaa : voice)

jaan tum par nisaar kartaa huuN
maiN nahiiN jaantaa du’aa kyaa hai

(jaan : life; nisaar : sacrifice; du’aa : prayer)

ham ne maanaa ke kuchh nahiiN “Ghalib”
muft haath aaye to buraa kyaa hai

(muft : free; haath aanaa: to get something; buraa : bad)

Mirza Ghalib

To receive free updates on new Ghazal, Nazm and Mushaira postings, please visit subscribe for options.