Aligarians.com

ghaTaaoN kii udaasii pii rahaa huuN
maiN ek gehraa samandar ban gayaa huuN

terii yaadoN ke angaaroN ko aksar
tasavvur ke laboN ko chuumtaa huuN

(tasavvur : imagination)

ko’ii pehchaan-ne vaalaa nahiiN hai
bhare baazaar meN tanhaa khaRaa huuN

meraa qad kitnaa uuNchaa ho gayaa hai
falak kii vus’atoN ko naaptaa huuN

(qad : stature; falak : heaven; vus’at : expansion; naaptaa : measure)

vo yuuN mujhko bhulaanaa chaahte haiN
ke jaise maiN bhii ko’ii haadisaa huuN

(haadisaa : event)

badalte mausamoN kii diary se
tere baare meN aksar puuchtaa huuN

kisii kii yaad ke pattoN ko “Aazer”
havaaoN se bachaa kar rakh rahaa huuN

(patte : leaves)

Kafeel Aazer

To receive free updates on new Ghazal, Nazm and Mushaira postings, please visit subscribe for options.