(5 votes, average: 4.00 out of 5)
Loading ...3,064 views
Click above to listen this Ghazal in Hafeez Hoshiarpuri’s own voice.
vafaa kii daastaaN chheRii kabhii tumne, kabhii hamne
ba-tarz-e-dilbarii tumne, ba-rang-e-aashiquii hamne
(vafaa : loyalty; daastaaN : story; ba-tarz-e-dilbarii : in a captivating style; ba-rang-e-aashiquii : in the color of love)
nigaar-e-shauq se baKhshii jinheN taabandagii hamne
tasavvur meN unhiiN jalvoN se maaNgii raushnii hamne
(nigaar : adornment; shauq : desire; taabandagii : brightness; tasavvur : imagination; raushnii : light)
vohii jalve, vohii aaNkheN, magar kyaa ho gayaa dil ko
na jaane kyuuN badal Daalaa mazaaq(?)-e-zindagii hamne
(jalve : splendours)
yahii viiraan aaNkheN haiN, yahii sunsaan raaheN haiN
yahiiN aksar jalaaye haiN chiraaGh-e-zindagii hamne
(viraan : lonely; sunsaan : silent; chiraaGh-e-zindagii : lamps of the life)
judaa’ii kaa samaa hai aaj tak apnii nigaahoN meN
na ko’ii baat kii tumne, na ko’ii baat kii hamne
(judaa’ii : separation; samaa : environment)
kisii ke jalvaa haaye nau-ba-nau jab yaad aaye haiN
to ashkoN se bujhayii hai nazroN kii tashnagii hamne
(nau-ba-nau : ?; ashk : tears; nazar : eyes; tashnagii : thirst)
vo kuch kahne ko the ham paa gaye, vo muskuraa uThThe
ko’ii to baat thii jo munh se chhiin lii hamne
(munh : mouth; chhiin : snatch)
hameN maaluum hai majbuuriyoN kii intihaa kyaa hai
ke dekhii hai nigaah-e-husn kii bechaargii hamne
(majbuurii : helplessness; intihaa : extreme; nigaah : eyes; husn : beauty; bechaargii : desperateness)
bas ek zauq-e-nazar par naaz thaa vo bhii nahiiN baaqii
“Hafeez” unke taGhaaful ko ye daulat saunp dii hamne
(zauq : taste; nazar : sight; naaz : pride; baaqii : left; taGhaaful : neglect; saunp : gave away)
Hafeez Hoshiarpuri
We are thankful to Suhail Kazi saahab for making this audio available to Aligarians.com
{ 4 comments… read them below or add one }
“vo kuchh kahne ko thay, ham paa gaye, vo muskuraa uTThe
ko’ii to baat thii jo un ke munh se chhiin lii hamne”
Waah!
bas ek zauq-e-nazar par naaz thaa vo bhii nahiiN baaqii
“Hafeez” unke taGhaaful ko ye daulat saunp dii hamne
khoob kaha……….
this gazal was written by my grandfather (hafeez)it nice to hear his voice as he is not among us
thanks to people who still honour his work
we are and always be proudof him
I want to know about the ghazal *kiun umar ganwa di hum ne*.kindly send me this whole ghazal of I think Ahmad Faraz.Thank you