zindagii ye to nahiiN tujhko saNvaaraa hii na ho
(10 votes, average: 4.2 out of 5)
Loading ...zindagii ye to nahiiN tujhko saNvaaraa hii na ho
kuch na kuch teraa ehsaan utaaraa hii na ho
(ehsaan : benifincence)
kuu-e-qaatil kii baRii dhuum hai, chal kar dekheN
kyaa Khabar, kuuchaa-e-dildaar se pyaaraa hii na ho
(kuu-e-qaatil : home of the murderer; kuuchaa-e-dildaar : house of the beloved)
dil ko chhuu jaatii hai raat kii aavaaz kabhii
chauNk uThtaa huuN kahiiN tuune pukaaraa hii na ho
kabhii palkoN pe chamaktii hai jo ashkoN kii lakiir
sochtaa huuN tere aaNchal kaa kinaaraa hii na ho
(ashk : tears)
zindagii ek Khalish de ke na rah jaa mujhko
dard vo de jo kisii suurat gavaaraa hii na ho
(Khalish : pricking)
sharm aatii hai ke us shah’r meN ham haiN ke jahaaN
na mile bhiik to laakhoN kaa guzaaraa hii na ho
Jan Nisar Akhtar
To receive free updates on new Ghazal, Nazm and Mushaira postings, please visit subscribe for options.
Mohtaram JaaN NiSaar AKhtar Sahib kee yeh Ghazal maiN ne Khood marHoom ki zubaani sunee thee. Yeh 1970 ke aaKhiree saaloN ki baat hai. Sabu Siddqiue Hall, Bombay (Oss waqt Mumbai ko Bombay kahaa jata tha) meN ek aalishaan mushaairah munAqid hoowa tha jsimeN marHoom ne apne maKhsoos andaaz meN taht meN yeh Ghazal paRhee thee. Urdu shairee ko jadeed samt meN le jane waloN meN mausoof ka naam bohat KhaasS maqaam rakhta hai. Unko naii Ghazal ka shahinshaah kahaa jaaye to shayad Ghalat nah hoga.
MaiN to yehee samajhta hooN keh unke SaHibzadey Janab Jawaid AKhtar Sahib behud baahunar honey ke bawojjod apne aaNjahanee walid se bohat peeche haiN, jahaN tak Urdu Ghazal ka sawal hai.Mere is Khyaal se aap ka muttafiq hona zaroori nahiN.
Isee Mushaaireh meN JaaN NiSaar AKhtar Sahab marHoom ne ek aur Ghazal bhi paRhee the jiska ek sher muhe yaad rah gaya hai:
aaj bhi jaise shanoN per tum haath mire rakh detee ho
chalte chalte rook jata hooN chooRee ki doonakoN per..
Mere marGhoob tareen shayar thay; Allah unheN apne jawaare rahmeat meN jagah dey aur unke darjaat ko buland farmaye.
Jawaid Badauni
Muscat - Oman
“dil ko chhuu jaatii hai jab raat kii aavaaz kabhii
chauNk uThtaa huuN, kahiiN tuune pukaaraa hi na ho”
Waa..h!