terii zamiiN se uThTheNge to aasmaaN hoNge
ham aise log zamaane meN phir kahaaN hoNge
chale gaye to pukaaregii har sadaa ham ko
na jaane kitnii zubaanoN se ham bayaaN hoNge
(sadaa : voice; bayaaN : explanation, description)
lahuu lahuu ke sivaa kuch na dekh paaoge
hamaare naqsh-e-qadam is qadar ayaaN hoNge
(naqsh-e-qadam : footprints; ayaaN : obvious)
sameT leejiye bhiige hu’e har ek pal ko
bikhar gaye jo ye motii to raayegaaN hoNge
(raayegaaN : useless)
udaas dil kaa Thikaanaa kisii ko kyaa ma’aluum
ham apne aap se bicchRe to phir kahaaN hoNge
Iffat Alvi
{ 2 comments… read them below or add one }
yeh ghazal janab ibrahim ashk sahab ki hai
miltee-jultee zameen per maine kuchh arz kiyaa hai, ssamaat farmaayen:
qatraa hoon apne ishq ke dariyaa mein ravaaN hooN/
hone ko hooN bhee aur jo dekho to kahaaN hooN?/
hoon jaisse jhukee uth ke koee pyaar mein nazar/
ssamjhe naheen to raaz hooN ssamjhe to bayaaN hooN/
kyaa khoob mere jalwaa-e-hastee kaa hai kamaal/
zaahir hooN khud pe iss tarah jaisse ki nihaaN hooN/
panhuchaa kahaaN-kahaaN hooN main apnee talaash mein/
lagtaa naheen ye main hooN yahaaN ab main jahaaN hooN/
hooN goonj bhee, gumbad bhee, apnaa maqbaraa bhee main/
khud hee makeeN hooN aur goyaa khud hee makaaN hooN/
toofaaN kaa main fareb hooN ssehraa hooN ret hooN/
mitane ke tassavvur ke liye naam-o-nishaaN hooN/
main hooN badan bhee aur iskaa chhootnaa bhee main/
apnee baqaa mein iss tarah ‘Gobind’ fanaa hooN/