jism ke neze par jo rakhaa hai
(No Ratings Yet)
Loading ...jism ke neze par jo rakhaa hai
us mere sar meN jaane kyaa kyaa hai
(neze par : on spear head)
but banaayaa mere hunar ne mujhe
mere haathoN ne mujh ko toRaa hai
(but : statue; hunar : craft, skill)
bastiyaaN ujRii haiN to sannaaTaa
merii aavaaz meN samaayaa hai
maiN bhii be-jaR kaa peR huuN shaayad
mujh ko bhii Dar havaa se lagtaa hai
(be-jaR : without roots)
shah’r meN kuch imaaratoN ke sivaa
ab meraa kaun milne-vaalaa hai
kahne-sunne ko kuch nahiiN baaqii
milnaa-julnaa ajab saa lagtaa hai
Muntazir Saleem
To receive free updates on new Ghazal, Nazm and Mushaira postings, please visit subscribe for options.
