diidah ashkbaar hai apnaa
aur dil-e-be-qaraar hai apnaa
(diidah : eyes; ashkbaar : tearful)
chashm-e-giryaaN se, chaak-e-daamaaN se
haal sab aashkaar hai apnaa
(chashm-e-giryaaN : lamenting eyes; chaak-e-daamaaN : torn clothes; aashkaar : obvious)
haa-o-huu meN har ek khoyaa hai
kaun yaaN Gham-gusaar hai apnaa
(haa-o-huu : ?; Gham-gusaar : sympathize)
sirf ek vo haiN sab ke muKhtaar
un pe kyaa iKhtiyaar hai apnaa
(muKhtaar : chosen; iKhtiyaar : will)
bazm se un ke jab se niklaa hai
dil Gharib-ud-dayaar hai apnaa
(Gharib-ud-dayaar : home of destitutes)
hai yahii rasm-e-maikadaa shaayad
nashaa un kaa, Khumaar hai apnaa
kyaa Ghalat sochte haiN “Miraji”
sher kahnaa sha’ar hai apnaa
(sha’ar : ?)
Miraji