aik hii muzhdah subh laatii hai

aik hii muzhdah subh laatii hai
sehn meN dhuup phail jaatii hai

(muzhdah : glad tidings; sehn : courtyard)

kyaa sitam hai ke ab terii suurat
Ghaur karne pe yaad aatii hai

sochtaa huuN ke us kii yaad aaKhir
ab kise raat bhar jagaatii hai

us vafaa-aashnaa kii furqat meN
Khvaahish-e-Ghair kyuuN sataatii hai

(vafaa-aashnaa : one who knows fidelity; Khvaahish-e-Ghair : desire for somebody else)

kaun is ghar kii dekh-bhaal kare
roz ek chiiz TuuT jaatii hai

Jaun Elia