mere Khudaa mujhe itnaa to mo’atbar kar de
(1 votes, average: 5 out of 5)
Loading ...mere Khudaa mujhe itnaa to mo’atbar kar de
maiN jis makaan meN rahtaa huuN use ghar kar de
(mo’atbar : trust-worthy)
ye roshnii ke ta’aqqub meN bhaagtaa hu’aa din
jo thak gayaa hai to ab is ko muKhtasar kar de
(ta’aqqub : to follow; muKhtasar : shorten)
maiN zindagii kii du’aa maangne lagaa huuN bahut
jo ho sake to duaaoN ko be-asar kar de
sitaaraa-e-sahrii Duubne ko aayaa hai
zaraa ko’ii mere suuraj ko baa-Khabar kar de
(sitaaraa-e-sahrii : morning star; baa-Khabar : inform)
qabiila-vaar kamaaneN kaRakne vaalii haiN
mere lahuuu kii gavaahii mujhe niDar kar de
(qabiila-vaar : tribal; kamaaneN : bows)
maiN apne Khvaab se kaT kar jiyuuN to mere Khudaa
ujaaR de merii miTTii ko dar-ba-dar kar de
merii zamiin meraa aaKhrii havaalaa hai
so maiN rahuuN na rahuuN is ko baa-ravar kar de
(baa-ravar : ?)
Iftikhar Arif
To receive free updates on new Ghazal, Nazm and Mushaira postings, please visit subscribe for options.
