(1 votes, average: 5.00 out of 5)
Loading ...1,653 views
mujhe tan se ziyaada, us kaa mann achchhaa lagaa thaa
aur us ki shakhsiyat kaa baaNkpan achhaa lagaa thaa
(shakhsiyat : personality)
Gharaz mujh ko nahiin thii zaahirii surat se us ki
mujhe tau sirf andaaz-e-suKhan achchhaa lagaa thaa
vo siidhii baat bhi kartaa thaa aksar shaayrii meN
mujhe uss kaa yehii diivaanaapan achchhaa lagaa thaa
zamaanaa keh rahaa thaa us ke baare meN fasaane
magar mujh ko tau us kaa har chalan achchhaa lagaa thaa
dhanak ke raNg hi bhaate haiN aksar laRkiyoN ko
mujhe tau eik saadaa pairahan achchhaa lagaa thaa
(pairahan : dress)
bane alfaaz aNgaare tau ab hairaan huuN maiN
ke us lahje kaa mujh ko dhiimaapan achchhaa lagaa thaa
mire baaloN ki chaaNdii se gurezaaN aaj hai vo
jise kal mera chaaNdii saa badan achchhaa lagaa thaa
vo jis dam us ne mujh se khelne ko chaaNd maaNgaa
mujhe bachche kaa apne, bholaapan achchhaa lagaa thaa
pariindaa laut ke vaapas qafas meN aa gayaa hai
jise phailaa huvaa niilaa gagan achchhaa lagaa thaa
Mona Shahab
We are grateful to B.G.M. saahab for providing us with this beautiful Ghazal.
{ 1 comment… read it below or add one }
that was so lovely and just after reading it i feel like that something has bounded by the situations and condition. lines are trying to get free from them.