na tum hu’e ho na ham hu’e haiN
yuuN hii ye qisee raqam hu’e haiN
(raqam : inscribed)
na hamne sehraa kii Khaak chhaanii
na un ke ruKhsaar nam hu’e haiN
(sehraa : deserts; Khaak : dust; ruKhsaar : cheeks)
na ko’ii shikve shikaayateN haiN
na ham pe ko’ii sitam hu’e haiN
(shikve : complaints)
azaab utre haiN dushmanii meN
na dostii meN karam hu’e haiN
Khudaa ne ham ko bhulaa diyaa hai
hamaare dushman sanam hu’e haiN
(sanam : idols)
zaruurateN bhii baRhii haiN “Alvi”
gireh meN paise bhii kam hu’e haiN
Muhammad Alvi