raat falak par rang-birangii aag ke gole chhuuTe

1,357 views

raat falak par rang-birangii aag ke gole chhuuTe
phir baarish vo zor se barsii mahek uThThe gul-buuTe

(falak : sky, heaven)

us kii aaNkh ke jaaduu kii har aik kahaanii sacchii
mere dil ke KhuuN hone ke sab afsaane jhuuTe

pahle-pahal to jii na lagaa pardes ke in logoN meN
raftaa-raftaa apne hii ghar se saare naate TuuTe

(raftaa-raftaa : slowly)

ye to sach hai sab ne mil kar dil-jo’ii bhii kii thii
apnii rusvaa’ii ke maze bhii sab yaadoN ne luuTe

(dil-jo’ii : sympathize; rusvaa’ii : disgrace)

maiN jo “Munir” ek kamre kii khiRkii ke paas se guzraa
us kii chiq kii tiiliyoN se resham ke shiGhuufe phhuTe

(shiGhuufe : flowers)

Munir Niazi