Aligarians.com

ab to shahroN se Khabar aatii hai diivaanoN kii
ko’ii pehchaan hii baaqii nahiiN viiraanoN kii

subh hote hii nikal aate haiN baazaar men log
gaThriyaaN sar pe uthaaye hu’e iimaanoN kii

apnii poshaak se hoshiyaar ke Khuddaam-e-qadiim
dhajjiyaaN maaNgte haiN apne gariibaanoN kii

(Khuddaam : attendant; qadiim : old)

san’ateN phailtii jaatii haiN magar iske saath
sarhadeN tuuTtii jaatii haiN gulistaanoN kii

unko kyaa fikr ke maiN paar lagaa ke Duubaa
bahes karte rahe saahil pe jo tuufaanoN kii

maqbare bante haiN zindoN ke makaanoN se baland
kis qadar auj pe takriim hai insaanoN kii

(maqbare : tombs)

terii rahmat to musallam hai magar ye to bataa
kaun bijlii ko Khabar detaa hai kaashaanoN kii

(kaashaane : shelters)

abhii takmiil ko pahunchaa nahiiN zehnoN kaa gudaaz
abhii duniyaa ko zaruurat hai Ghazal-KhvaanoN kii

(takmiil : fulfillment; gudaaz : development; Ghazal-KhvaanoN : Ghazal reciters)

Ahmed Nadeem Qasmi

To receive free updates on new Ghazal, Nazm and Mushaira postings, please visit subscribe for options.