baa-vafaa’ii kii adaa paane lagaa huuN tujh meN
ai jafaa-dost ye kyaa dekh rahaa huuN tujh meN
(baa-vafaa’ii : fidelity; jafaa-dost : unfaithful friend)
tuu daryaa hai ke jiskaa ko’ii saahil hii nahiiN
maiN safiine kii tarah Duub gayaa huuN tujh meN
tere chehre se haTaa’ii nahiiN jaatii nazreN
kyaa Khabar der se kyaa dekh rahaa huuN tujh meN
meraa daavaa hai ke tuune bhii na dekhe hoNge
aise jalve ke jo maiN dekh rahaa huuN tujh meN
paas itnaa ke terii saaNsoN se Takraatii hai saaNs
duur itnaa ke tujhe dhuuNd rahaa huuN tujh meN
bevafaa terii zubaaN par ye vafaa kii baateN
aisaa lagtaa hai ke maiN bol rahaa huuN tujh meN
Shamim Jaipuri
{ 4 comments… read them below or add one }
Bohat khoob,umdaah andaaz se shamim sb ne alfaaz ki kaarigari dikhaaiyii hai
paas itnaa ke terii saaNsoN se Takraatii hai saaNs
duur itnaa ke tujhe dhuuNd rahaa huuN tujh meN
Is he Alive..?
No, he died some years back.
You can expect to see more of his Ghazals in the coming days.
kia baat hai jee, kamal ki ghazal hai. bohat umda