(7 votes, average: 4.71 out of 5)
Loading ...4,956 views
baat kam kiije zehaanat ko chhupaate rahiye
ye nayaa shah’r hai kuch dost banaate rahiye
(zehaanat : intellect)
dushmanii laakh sahii Khatm na kiije rishtaa
dil mile yaa na mile haath milaate rahiye
—-
kabhii kabhii yuuN bhii hamne apne jii ko behlaayaa hai
jin baatoN ko Khud nahiiN samjhe auroN ko samjhaayaa hai
Mir-o-Ghalib ke sheroN ne kiskaa saath nibhaayaa hai
saste giitoN ko likh likh kar hamne ghar banvaayaa hai
—-
dil meN na ho jurrat to muhabbat nahiiN miltii
Khairaat meN itnii baRii daulat nahiiN miltii
kuch log yuuN hii shah’r meN hamse bhii Khafaa haiN
har ek se apnii bhii tabiiyat nahiiN miltii
(tabiiyat : nature)
—-
insaan meN haivaan yahaaN bhii hai vahaaN bhii
Allah nigehbaan yahaaN bhii hai vahaaN bhii
KhuuN-Khaar darindoN ke faqat naam alag haiN
har shah’r bayaabaan yahaaN bhii hai vahaaN bhii
(bayaabaan : deserted)
rahmaan kii qudrat ho ke bhagvaan kii muurat
har khel kaa maidaan yahaaN bhii hai vahaaN bhii
uThtaa hai dil-o-jaaN se dhuaaN donoN taraf hii
ye Mir kaa diivaan yahaaN bhii hai vahaaN bhii
Nida Fazli
{ 3 comments… read them below or add one }
A RARE SENSIBILITY WITH RARE TOUCH OF HUMAN RELATIONS WITH A DEEP TOUCH OF NATURE AND RELIGION
mai nida sahab ka fan hu.mujhe unki har nazm pasand aati hai.khas kar ye-insaan me haivaan yanha bji hai wanha bhi…………………….
Nida faazli ke ashaar, asal zindagi se waasta rakhte he, or alfaaz behad maqbul zubaan se liye hue he, jo sher padhne or samajhne me asaan hote he,
yaha unki gazal ke chuninda she liye he jo khazane se yaaqute-akmar nikalne or use sajane se kam nahi he.