(5 votes, average: 4.80 out of 5)
Loading ...2,903 views
ruKhsat hu’aa to aaNkh milaa kar nahiiN gayaa
vo kyuuN gayaa hai ye bhii bataa kar nahiiN gayaa
vo yuuN gayaa ke baad-e-sabaa yaad aa gayii
ehsaas tak bhii hamko dilaa kar nahiiN gayaa
yuuN lag rahaa hai jaise abhii lauT aayegaa
jaate hu’e chiraaGh bujhaa kar nahiiN gayaa
bas ek lakiir kheNch gayaa darmiyaan meN
diivaar raaste meN banaa kar nahiiN gayaa
shaayed vo mil hii jaaye magar justujuu hai shart
vo apne naqsh-e-paa miTaa kar nahiiN gayaa
ghar meN hai aaj tak vohii Khushbuu basii hu’ii
lagtaa hai yuuN ke jaise vo aa kar nahiiN gayaa
tab tak to phuul jaisii hii taazaa thii uskii yaad
jab tak vo pattiiyoN ko judaa kar nahiiN gayaa
rahne diyaa na usne kisii kaam kaa mujhe
aur Khaak meN bhii mujhko milaa kar nahiiN gayaa
vaisii hii betalab hai abhii merii zindagii
vo Khaar-o-Khas meN aag lagaa kar nahiiN gayaa
“Shehzad” ye gilaa hii rahaa uskii yaad se
jaate hu’e vo ko’ii gilaa kar nahiiN gayaa
Shehzad Ahmed
{ 5 comments… read them below or add one }
nice ghazal…
Bahut umdah…shaayed vo mil hii jaaye magar justujuu hai shart
vo apne naqsh-e-paa miTaa kar nahiiN gayaa….wah wah Shehzad sahab maza aagaya..
waah waah!!
bahut khoobsurat ghazal hai..
“rahne diyaa na usne kisii kaam kaa mujhe
aur Khaak meN bhii mujhko milaa kar nahiiN gayaa”
javed.a.khan@in.abb.com
the intense frustration of a lover who is neither jilted nor accepted by his beloved is beautifully rendered in this ghazal
bahut khoob
ruKhsat hu’aa to aaNkh milaa kar nahiiN gayaa
vo kyuuN gayaa hai ye bhii bataa kar nahiiN gayaa
mera zikrr sunke bahut tuut kar roya
sinee se apney magar mujhko lagaa kar nahin gayaa