sitam-rasiidaa hai Hindustan meN Urdu
isii zubaan meN Hindustan ziyaadaa hai
(sitam-rasiidaa : persecuted)
———
ucchal paRtaa hai saayaa aur mujhko Dar nahiiN lagtaa
ko’ii aaseb ho insaan se baRh kar nahiiN lagtaa
(aaseb : ghost)
kahiiN kacche phaloN ko sang-baarii toR letii hai
kahiiN phal suukh jaate haiN ko’ii patthar nahiiN lagtaa
(sang-baarii : barrage of stones)
hazaaroN mushkileN haiN dostoN se duur rahne meN
magar ek faaydaa hai piiTh par Khanjar nahiiN lagtaa
———
kahaa phir phone par maaN se ke raavii aish likhtaa hai
samandar paar meraa haal kyaa hai kisne dekhaa hai
(raavii : narrator)
ujaale ke numaainde nayii taariiKh likhte haiN
jalaayii haiN kuch itnii bastiyaaN har suu ujaalaa hai
(numaainde : nominated members)
itnii nokiilii kirnoN se pauDhaa to jal jaayegaa
lekin das-baaraah GhanToN meN suuraj bhii Dhal jaayegaa
Muzaffar Hanfi
Courtesy: Syed Abubaker Maliki
{ 9 comments… read them below or add one }
i am first to say that this website is really great resource of urdu poetry. and probably the best.
Asalam-o-Alaikum
its very beautiful……..
Kahiin kacche phalon ko sang-baarii tor letii hai
Kahiin phal suukh jaate hain ko’ii patthar nahiin lagtaa
Hazaaron mushkilen hain doston se duur rahne men
Magar ek faaydaa hai piith par Khanjar nahiin lagtaa
Bahut khoob Dr. Muzaffar Hanfi Sahib. Dr Sahib ke alfajon ne mere zehan ke dariya mein bhi ek lehar uthai,aur ye alfaaz ubhar aye,
Aaj ki nassal ko is tarahan palla ja raha hai dost,
Vo navaqiif hain jungle se aur,ghar bhi ghar nahin lagtaa.
Jagat mein tej-raftaarii ka ab kuch aisa Aalam hai,
kisi ko bhi kisi se ab koi matalab nahin lagataa.
Roz ke hadison se sab hi itne khaufzadda hain,
ke sab darten hai jine se, Maut se dar nahin lagtaa.
kahiiN kacche phaloN ko sang-baarii toR letii hai
kahiiN phal suukh jaate haiN ko’ii patthar nahiiN lagtaa
bahut pyara sher hai thank for this sher
This is mindblowing way to know about and its litreture around the world.
Mohtaram Pro Muzzafar Hanafi Sahab Salam-e-Neyaaz. net par aapke cheedah khhayalaat ke haamil ashaar padhne aur dekhne ke baad dil ko taqweeat ke saath naye ahang ki roushni mili aur saath hi saath Calcutta men aap ke saath jo din guzare the woh saari yaaden tar-o-taza ho gaiyeen.Allah se dua karta hoon ke appki sehat ko nayi zindigi milti rahe aur umr daraaz ho AAmeen. aapka neyaazmand
Anwar Hussain Anjum
(Matiya burj) Calcutta.
hazaaroN mushkileN haiN dostoN se duur rahne meN
magar ek faaydaa hai piiTh par Khanjar nahiiN lagtaa
Sahi kaha
hazaaroN mushkileN haiN dostoN se duur rahne meN
magar ek faaydaa hai piiTh par Khanjar nahiiN lagtaa. Mashaallah bahut Khubsurat sher Hai . Aisa Lagta hai Jaise aaj Kal ke halat aina ho .
Great poetry………. to touch the heart…..