Aligarians.com

ajiib Khvaahish hai shah’r-vaaloN se chhup-chhupaa kar kitaab likhuuN
tumhaare naam apnii zindagii kii kitaab kaa intisaab likhuuN

(intisaab : attribution)

maiN tanhaa laRkii dayaar-e-shab meN jalaauuN sach ke diye kahaaN tak
siyaahkaaroN kii sultanat meN maiN kis tarah aaftaab likhuuN

(dayaar-e-shab : house of night; siyaah : black; sultanat : empire; aaftaab : light)

———

vo baat baat meN itnaa badaltaa jaataa hai
ke jis tarah ko’ii va’adaa badaltaa jaataa hai

ye aarzuu thii ke ham uske saath saath chaleN
magar vo shaKhs to rastaa badaltaa jaataa hai

jo tez dhuup meN sar par rahaa vohii aaNchal
havaa chalii hai to kitnaa badaltaa jaataa hai

ruteN visaal kii ab Khvaab hone vaalii haiN
ke uskii baat kaa lehjaa badaltaa jaataa hai

vo baat kar jise duniyaa bhii moatbar samjhe
tujhe Khabar hai zamaanaa badaltaa jaataa hai

———

ko’ii mujhko meraa bharpuur saraapaa laa de
mere baazuu merii aaNkheN meraa chehraa laa de

(saraapaa : being)

aisaa dariyaa jo kisii aur samandar meN gire
is se behtar hai ke mujhko meraa sehraa laa de

(sehraa : wilderness)

nayaa mausam merii biinaa’ii ko tasliim nahiiN
merii aaNkhoN ko vohii Khvaab puraanaa laa de

(biinaa’ii : vision; tasliim : accept)

kuch nahiiN chaahiye tujhse merii umr-e-ravaaN
meraa bachpan mere jugnuu merii guRiyaa laa de

(umr-e-ravaaN : age gone by)

kashtii-e-jaaN to bhanvar meN hai ka’ii barsoN se
ai Khudaa ab to Dubo de yaa kinaaraa laa de

(kashtii-e-jaaN : boat of life)

Noshi Gilani

To receive free updates on new Ghazal, Nazm and Mushaira postings, please visit subscribe for options.