zindagii tanhaa safar kii raat hai
apne apne hausle kii baat hai
kis aqiide kii duhaa’ii deejiye
har aqiidah aaj be-auqaat hai
(aqiidah : belief; be-auqaat : without value)
kyaa pataa pahuNcheNge kab manzil talak
ghaTte-baRhte faasiloN kaa saat(h) hai
(saat(h) : company)
Jan Nisar Akhtar
To receive free updates on new Ghazal, Nazm and Mushaira postings, please visit subscribe for options.
jaaiye baiThiye hukmraanoN ke biich
aap kyuuN aa gaye ham divaanoN ke biich
(hukmraanoN : rulers)
aur kyaa hai siyaasat ke baazaar meN
kuch khilone saje haiN dukaanoN ke biich
(siyaasat : politics)
thaa jinheN ishq kaa hauslaa uTh gaye
tazkire rah gaye daastoN ke biich
(hauslaa : ambition; tazkire : talks; daastaaN : stories)
ishq ke naam par aur to kyaa hogaa
dushmani ho gayii do gharaanoN ke biich
(gharaane : families)
bhuule na kisii haal meN aadaab-e-nazar ham
muR kar na tujhe dekh sake vaqt-e-safar ham
(aadaab : etiquettes; nazar : sight, view; vaqt-e-safar : departing time)
ai husn! kisii ne tujhe itnaa to na chaahaa
barbaad hu’aa tere liye kaun, magar ham
jiine ka hameN Khud na milaa vaqt to kyaa hai
logoN ko sikhlaate rahe jiine kaa hunar ham
(hunar : skill, excellence)
ab tere ta’lluq se hameN yaad hai itnaa
ek raat ko mehmaan rahe the tere ghar ham
Why Advertise?
