Aligarians.com

Click below to listen this nazm in Kaifi Azmi’s own voice.

jab bhii chuum letaa huN un hasiiN aaNkhoN ko
sau chiraaGh andhere meN jhilmilaane lagte haiN
Khushk Khushk hoNTon meN jaise dil kheNch aataa hai
dil meN kitne aa’iine TharTharaane lagte haiN

phuul kyaa, shiGhuufe kyaa, chaaNd kyaa, sitaare kyaa
sab raqiib qadmoN par sar jhukaane lagte haiN
zehn jaag uThtaa hai, ruuh jaag uThtii hai
naqsh aadmiyaat ke jagmagaane lagte haiN
lau nikalne lagtii hai mandiroN ke siine se
devtaa fazaaoN meN muskuraane lagte haiN

Click below to listen this nazm in Kaifi Azmi’s own voice.

maiN ye soch kar us ke dar se uThaa thaa
ke vo rok legii manaa legii mujhko
qadam aise andaaz se uTh rahe the
ke vo aavaaz de kar bulaa legii mujh ko
havaaoN meN lahraataa aataa thaa daaman
ke daaman pakaR kar biThaa legii mujhko

Click below to listen this Ghazal in Kaifi Azmi’s own voice.

sunaa karo merii jaan in se un se afsaane
sab ajnabii haiN yahaaN kaun kis ko pahchaane

(afsaane : fiction, stories; ajnabii : strangers)

yahaaN se jald guzar jaao qaafile vaaloN
haiN merii pyaas ke phuuNke hu’e ye viiraane

(qaafilaa : caravan; viiraane : ruins)

merii junuun-e-parastish se tang aa gaye log
sunaa hai band kiye jaa rahe haiN but-Khaane