Aligarians.com

harf harf raT kar bhii aagahii nahiiN miltii
aag naam rakhne se roshnii nahiiN miltii

(harf : letter; aagahii gnosis)

sochne samajhne ko faasilaa hii behtar hai
raat din kii qurbat se dostii nahiiN miltii

(faasilaa : distance; qurbat : intimacy)

miiThii miiThii baatoN meN sirf sach nahiiN hotaa
maslehat-pasandoN meN sar-kashii nahiiN miltii

(sach : truth; maslehat-pasand : rational, pragmatic people; sar-kashii : tyranny)

aadmii se insaaN tak aa gaye to samjhoge
kyuuN chiraaGh ke niiche roshnii nahiiN miltii

hamaare dil pe jo zaKhmoN kaa baab likhaa hai
usii meN vaqt kaa saaraa hisaab likhaa hai

(baab : chapter; hisaab : calculation)

kuch aur kaam to ham se na ho sakaa lekin
tumhaare hijr kaa ek ek azaab likhaa hai

(hijr : separation; azaab : punishment)

suluuk nishtaroN jaisaa na keejiye ham se
hameshaa aap ko ham ne gulaab likhaa hai

(nishtar : dagger; gulaab : rose)