Aligarians.com

haiN aabaad laakhoN jahaaN mere dil meN
kabhii aao daaman-kushaaN mere dil meN

utartii hai dhiire se raatoN kii chup meN
tere ruup kii kahkashaaN mere dil meN

(kahkashaaN : galaxy)

ubhartii haiN raahoN se kirnoN kii lahreN
sisaktii haiN parchhaiiyaaN mere dil meN

zamaane ke lab par zamaane kii baateN
merii dukh-bharii daastaaN mere dil meN

ko’ii kyaa rahegaa jahaaN-e-fanaa meN
raho to raho jaavidaaN mere dil meN

(jahaaN-e-fanaa : mortal world; jaavidaaN : eternal)

raat falak par rang-birangii aag ke gole chhuuTe
phir baarish vo zor se barsii mahek uThThe gul-buuTe

(falak : sky, heaven)

us kii aaNkh ke jaaduu kii har aik kahaanii sacchii
mere dil ke KhuuN hone ke sab afsaane jhuuTe

pahle-pahal to jii na lagaa pardes ke in logoN meN
raftaa-raftaa apne hii ghar se saare naate TuuTe

(raftaa-raftaa : slowly)

ye to sach hai sab ne mil kar dil-jo’ii bhii kii thii
apnii rusvaa’ii ke maze bhii sab yaadoN ne luuTe

jo bhii ghar se jaataa hai
ye kah kar hii jaataa hai
“dekho, mujh ko bhuul na jaanaa
maiN phir lauT ke aauuNgaa
dil ko acche lagne vaale
laakhoN tuhfe laauuNgaa
naye naye logN kii baateN
aa kar tumheN sunaauuNgaa”
lekin aaNkheN thak jaatii haiN
vo vaapis nahiiN aataa hai
log bahut haiN aur vo akelaa
un meN gum ho jaataa hai

Munir Niazi

To receive free updates on new Ghazal, Nazm and Mushaira postings, please visit subscribe for options.